БИШКЕК, 1-ноя.— Sputnik. Маданият, маалымат жана туризм министрлиги тарабынан Үркүндүн 100 жылдыгына карата уюштурулган музыкалык сынак жыйынтыкталды. Бул тууралуу аталган министрликтен билдирди.
Маалыматка ылайык, үстүбүздөгү жылдын 31-октябрь күнү жеңүүчүлөргө сыйлык тапшыруу аземи болуп, ага маданият, маалымат жана туризм министри Түгөлбай Казаков катышты.
Композиторлор союзунун жетекчиси Турдубек Чокиев сынак үч багытта өтүп, ага 42 автор катышканын билдирди.
Аспапта ойнолгон чыгармалар багытында биринчиликти Эсенгул Жумабаевдин "Жетиген" жана Турдубек Чокиевдин "Залкар" чыгармалары алса, Бакыт Алишеровдун "Улуу дүйнө" жана Сатылган Осмоновдун "Манас" эмгектери экинчи, Таалайбек Доороновдун "Туш көрүү" чыгармасы үчүнчү орунду ээледи.
Хор багытында баш байгени Наргиза Курманованын "Космос" чыгармасы илип кетти. Ал эми Акимжан Жээнбаевдин "Эскерме кербез" эмгеги экинчи, Совхозбек Айткеевдин "Вокализ" чыгармасы үчүнчү болду.
Мындан сырткары, Сталбек Бактыгуловдун "Маяк", Жылдыз Малдыбаеванын "Сюита", Мухтар уулу Ишенбектин "Мейкин", Кубанычбек Осмоновдун "Рондо" жана Турдубек Чокиевдин "Менин элим" чыгармалары баалуу белектер менен сыйланды.
Министрлик жалпы сынак үчүн бир миллион сом бөлгөн.
