БИШКЕК, 31-окт. — Sputnik. Ысык-Көл облусунда кызды өлтүрүүгө шектелип кармалган жаран тергөө учурунда эки айга камакка алынганын ИИМдин маалымат кызматынан кабарлашты.
Мындай чечим Ысык-Көл райондук соту тарабынан чыгарылган.
Буга чейин жергиликтүү мектепте мугалим болуп иштеген кыз жолугушууга барганда 11 жолу бычак жегенин милициядан кабарлашкан. Ал оор жаракаттан улам көз жумган.
24 жаштагы шектүү жаран ошол эле күнү кармалган. Ал буга чейин кылмыш жоопкерчилигине тартылганы белгилүү болгон.
Алдын ала маалыматтар боюнча бул киши каза болгон кызга жабышып жүргөн. Бирок кыз аны жактырчу эмес. Кырсык болгон күнү кармалган адам кызды жолугушууга чакырган.
Учурда аталган адамга карата кылмыш жаза кодексинин 97-беренесинин (ырайымсыздык менен киши өлтүрүү) негизинде кылмыш иши козголду.
