БИШКЕК, 31-окт. — Sputnik. Тажик кызын чоң каналга агып бараткан жеринен сактап калган Абдисатар Садыков окуя кандай болгонун Sputnik Кыргызстан агенттигине айтып берди.
Окуя 31-октябрда саат түшкү 12лер чамасында Көк-Таш айылына жетпей Миң-Өрүк участкасынын ортосунда болгон. Аталган канал Баткендеги Төрткүл суу сактагычына куят.
"Жолдо баратканда бир бала кол булгалап калды. Эмне болду десек, каналдан бирөө агып баратканын айтты. Чуркап барсак, каналдан бир карасаң, жаш бала, бир карасаң кыздай көрүнүп, киши агып келе жатыптыр. Аны куткарып алгандан кийин 15-16 жаштагы кыз экенин билдик. Мен өзүм дагы каналдан кайта чыга албай 30-40 метрдей агып бардым. Каналдан мени кайра шериктерим чыгарды", — деди Садыков.
Ал ошондой эле жанындагы кишилер андан улуу болгондуктан эч ойлонбостон эле кийимин чечип сууга киргенин кошумчалады.
"Суунун муздак экенин суудан чыккандан кийин гана сездим. Ошол жерден эле чек ара тозотунун кызматкерлерин чакырып, кызды өткөрүп бердик. Ал кыргызча, орусча же өзбекче билбегендиктен каналга кантип түшүп кеткенин сурап, жооп ала албай койдук", — деди Садыков.
Кыздын өмүрүн сактап калган ишкер 39 жашта, Баткен шаарынын тургуну бир кыз, эки уулдун атасы.
