БИШКЕК, 27-окт.— Sputnik. Борбордук Азиядан Россияга бара жаткан поезд жүргүнчүлөрүн эл аралык террордук топтор азгырып келишкен. Бул тууралуу Шанхай кызматташтык уюмунун аймактык терроризмге каршы түзүмүнүн Аткаруу комитетинин директору Евгений Сысоев билдирди.
Бейшемби күнү Ташкент шаарында Шанхай кызматташтык уюмунун эл аралык терроризмге жана экстремизмге каршы күрөшү боюнча кызматташтыгынын төртүнчү илимий-практикалык конференциясы ачылды.
"2015-жылы террордук уюмдар Кыргызстан, Тажикстан жана Казакстандан Россияга бара жаткан поезддин жүргүнчүлөрүнө аскердик кызматка үгүттөшкөн. Бирок укук коргоо органдары алардын иш-аракетине бөгөт койгон", — деди Сысоев конференциянын ачылышында.
Кыргызстандын коопсуздук күчтөрү менен биргеликте 20 террорчунун иш-аракети токтотулган. Сысоев ошондой эле былтыркы жылы ШКУ өлкөлөрүнөн 500 сайт жана экстремисттик мазмунду камтыган 200 миң материал жок кылынганын айтты.
