БИШКЕК, 27-окт. — Sputnik. Казакстан кыргыз-казак чек арасындагы фитосанитардык көзөмөлдү алып салгандыгын Ветеринардык жана фитосанитардык коопсуздук инспекциясынын маалымат кызматынан кабарлашты.
Белгилей кетсек, октябрь айында Евразиялык экономикалык комиссия Казакстанга кыргыз-казак чек арасындагы фитосанитардык көзөмөлдү ЕАЭБдин талаптарына ылайык алып салуу сунушун берген. Аны аткарууга 7-октябрдан тарта Казакстанга 10 күн убакыт берилген. Ал эми Кыргызстан бул норманы өткөн жылдын май айында аткарган.
"Казакстан фитосанитардык көзөмөлдү чек арадан албагандыктан соода жүгүртүүдө бир топ кыйынчылыктар жаралууда", — деп буга чейин ЕЭК белгилеген.
Кыргызстандын Ветеринардык жана фитосанитардык коопсуздук инспекциясы чек арадагы чектөө алынгандыгы тууралуу билдирме Казакстандын Айыл чарба министрлиги тарабынан бейшемби күнү келгендигин ырастады.
Кыргызстан 2015-жылдын август айында ЕАЭБге толук кандуу мүчө болуп кирген.
