БИШКЕК, 17-окт. — Sputnik. "Ислам мамлекети" террористтик уюмунун жан кечтиси Мосул шаарынын чыгыш аймагында аскер кызматкерлеринин колоннасына кол салып, 70ке чукул киши каза болду. Бул тууралуу Firat күрд агенттигине таянуу менен РИА Новости жазып чыкты.
Маалыматка ылайык, кол салуу Мосулдун чыгышында жайгашкан Гияр аймагындагы Билавет айылында болгон. Ирактын аскер кызматкерлери шаарга кирип баратканда жан кечти өзүн жардырып жиберген.
Дүйшөмбү күнү АКШ башында турган коалициянын колдоосу менен ирак армиясы менен күрд өзүн өзү коргоо күчтөрү Мосулду бошотуу боюнча операция башташкан. Ага 80 миңге чукул жоокер тартылганы маалымдалган. Армияга шаарды 2014-жылдан бери ээлеп турган "Ислам мамлекетинин" бир нече миңдеген согушкери каршылык көрсөтүүдө.
