БИШКЕК, 17-окт. — Sputnik. Жакырчылыкты жоюунун эл аралык күнүнө карата Sputnik Кыргызстан агенттиги UNICEF жана Улуттук статистикалык комитеттин маалыматына таянып, жакыр үй-бүлөлөр тууралуу 15 факты даярдады.
- Эгер өзүңүздүн муктаждыгыңыз үчүн бир күндө 87 сомдон ашпаган каражат жумшасаңыз, кембагал болуп саналасыз.
- Эгер 50 сомдун чегинен аша албасаңыз, өтө эле жакырсыз.
- Кыргызстанда ар бир үчүнчү кыргызстандык жакыр болуп саналса, ар бир жүзүнчү жаран өтө кедей. Материалдык муктаждыгы күч адамдардын көбү Жалал-Абадда жашайт. Ал эми эң бай облус болуп Талас дубаны саналат.
- Жакыр калктын үчтөн эки бөлүгү элетте күн кечирет.
- Эмгек мигранттар өлкөгө акча которууну токтотсо жакырчылыктын деңгээли 32 пайыздан 38 пайызга өсүп кетет. Ошондой эле каражат которуулар 360 миң адамды жакырчылыктан сактап келет. Мигранттар иштебей калса, анын залакасы көбүнчө Жалал-Абад, Баткен жана Ош облустарында байкалат.
Өмүрүндө бир ирет тамеки чегип көргөндөрдүн арасында байларга (27) салыштырмалуу кедейлердин (4) саны аз. Алкоголдук ичимдик колдонууда дагы ушундай эле көрүнүш. Колунда бар аялдардын 63 пайызы өмүрүндө жок дегенде бир ирет ичимдик татып көрсө, кедейлердин саны салыштырмалуу эки эсеге аз.
Беш кичинекей баланын экөө кедей үй-бүлөдө тарбияланат.
Орточо статистика боюнча жакыр үй-бүлө алты адамдан турат. Колунда бар үй-бүлөлөрдө төрт гана адам жашайт. Алардын экөө ата-эненин балдары.
Кыргызстанда үй-бүлө канчалык жакыр болсо, балдарынын саны дагы көп. Беш баладан ашык үй-бүлөлөрдүн 70 пайызы жакырчылыкта жашайт.
Байларга караганда кедейлер балдарын көбүрөөк таштайт. 81 пайыз бала ата-энеси менен жашаша, кедейлер арасында 75 пайызды түзөт.
Аз кирешеге карабастан кедей үй-бүлөлөрдүн балдарынын 94 пайызында оюнчук бар. Бирок жети баланын бирөөнүн гана үйүндө китеби болот.
Бай үй-бүлөлөргө салыштырмалуу кедейлердин 3-5 жаштагы балдарынын окууга болгон жөндөмү алты эсеге төмөн.
Жумушсуз гана адамдар жакырчылыкта жашайт деген кеп болгону уламыш. Себеби андай үй-бүлөлөрдүн саны үч пайызды гана түзөт. Кедейлердин көпчүлүгүнүн иштеген жумушу бар.
Жалгыз бойлуу аялдардын тогуз пайызы гана жакырчылыкта жашайт.
Жакырчылыкта жашаган көпчүлүк кыргызстандыктар таза суу менен камсыз болушкан эмес. Буга байланыштуу алар сууну кудуктан ташууга аргасыз.
