БИШКЕК, 16-окт. — Sputnik. Кайгуул милициясынын 602 АА номерлүү унаасы жол эрежесин бузуп, экинчи катардан солго бурулуп кеткен. Бул тууралуу WhatsApp-канал аркылуу окурман билдирди.
Анын айтымында, окуя 14-октябрь күнү Ахунбаев менен Абдрахманов көчөлөрүнүн кесилишиндеги тыгын учурунда болгон.
"Өтө акылдуу болуп, экинчи катардан солго бурулуп кетти", — деди күбө.
Окурман ал унаа токтотууда эреже бузгандарды каттай турган мобилдик түзүлүш орнотулган машина экенин белгиледи. Эскерте кетсек, буга чейин ИИМ дал ушул машинаны эл назарына тартуулаган.
Ал эми ИИМдин маалымат борборунун башчысы Алмаз Бообеков аталган факт тастыкталса, айдоочуга административдик жаза колдонуларын билдирди. Азырынча ал аталган унаанын атайын түзүлүш менен жабдылганын тактаган да, жокко чыгарган да жок.
Эгер кандайдыр бир өзгөчө окуяга же жаңылыкка күбө болсоңуз WhatsApp-каналга +996 706 566 544 номери боюнча кабарласаңыз болот.
