БИШКЕК, 14-окт. — Sputnik. Бишкектин Товарная көчөсүндө жайгашкан "Дыйкан-Пишпек" базары жабыла турганын мэрия билдирди.
Маалыматка ылайык, мындай чечим базарда аныкталган бир катар мыйзам бузуулардан улам адамдардын ден соолугуна кам көрүү жана коопсуздугун сактоо максатында Мамлекеттик экологиялык-техникалык инспекция тарабынан кабыл алынган.
Үстүбүздөгү жылдын 6-10-октябрь күндөрү өткөн текшерүүлөр базар өрт коопсуздугунун талаптарына жооп бербей турганы жана антисанитардык абалда экенин аныктаган. Мындан тышкары, Фучик менен Товарная көчөлөрүнүн эки жагына токтогон унаалардан улам көп чакырымга созулган тыгын пайда болуп келген. Бул ошол аймакта жашаган тургундарга бир топ ыңгайсыздыктарды жараткан.
"Дыйкан" базарынын соодагерлери Биринчи Май районуна караштуу жаңы ачылган "Сары-Өзөн" базарына көчүрүлдү.
Эскерте кетсек, аталган базар 2008-жылы ачылып, жалпы аянты 2,6 гектарды түзүп келген.
