БИШКЕК, 13-окт. — Sputnik. КР Жогорку сотунун жазык иштери жана административдик укук бузуулар жөнүндөгү боюнча соттук коллегиясы Ахматбек Келдибековго карата жазык ишти карап, Бишкек шаардык сотунун 2016-жылдын 11-мартындагы өкүмүн жана аныктамасын күчүндө калтырды. Бул тууралуу Жогорку соттон маалымдашты.
Буга чейин Бишкек шаардык соту Келдибековду кызматтык абалынан кыянаттык менен пайдаланган деп айыптап, 100 000 эсептик көрсөткүчтө (10 миллион сом) айып салган.
Ага Кылмыш жаза кодексинин 30-беренесинин төртүнчү бөлүгү (кылмышка шериктеш болуу), 303-беренесинин биринчи бөлүгү (коррупция), 304-беренесинин төртүнчү бөлүгү (кызматтык абалынан кыянаттык менен пайдалануу) боюнча кылмыш иши козголгон.
Келдибеков жогорудагы айыптар менен 2013-жылы камакка алынган. Бишкек шаарынын Биринчи май райондук соту Келдибековду "Коррупция" беренеси боюнча актап, ал эми Москвадагы өкүлчүлүктү ачуу боюнча үч миллион сом айып пул салган.
