БИШКЕК, 10-окт. — Sputnik. Психикалык ден соолук боюнча республикалык борбордо "Кыргызстандагы өз өмүрүн кыюу жагдайы, абалдан чыгуу жолдору" аттуу тегерек стол өтүп жатканын Саламаттык сактоо министрлиги билдирди.
Иш-чара Дүйнөлүк психикалык ден соолук күнүнө арналган. Ага аталган министрликтин өкүлдөрү — психиатрлар, наркологдор, психотерапевттер, медициналык психологдор катышууда.
"Жолугушууда бейтапты мажбурлап дарылоо, психиатриялык мекемелерде стационардык экспертиза өткөрүү, "Саламаттык сактоо жана социалдык коргоо" долбоорунун аткарылышы, психикалык ден соолукту чыңдоо боюнча мамлекеттик программа иштеп чыгуу маселелери каралып жатат", — деп айтылат билдирүүдө.
"Бул көйгөй Кыргызстан үчүн да актуалдуу. Саламаттык сактоо министрлиги акыркы жылдарда суицидди шарттаган жагымсыз социалдык-экономикалык абал түзүлгөнүн белгилейт. Психикалык ооруга калктын 100 миң кишисинин 149,9 адамы чалдыккан", — деп айтылат маалыматта.
Дүйнөлүк саламаттык сактоо күнү 1992-жылдын 10-октябрынан бери Дүйнөлүк психикалык ден соолук федерациясынын демилгеси менен өткөрүлүп келет.
