БИШКЕК, 7-окт. —Sputnik. Бишкектеги №42 мектептин администрациясы ата-энелер менен мугалимдерден мыйзамсыз акча чогултканы үчүн жазаланганын Акыйкатчы институтунун маалымат кызматы кабарлады.
Билдирүү боюнча акыйкатчы Кубат Оторбаевдин дарегине аталган мектептин мугалимдери кайрылган.
"Арызда ата-энелер менен мугалимдерден жыйналган акча маселеси көтөрүлгөн. Каражат негизинен семинар, майрамдык иш-чара өткөрүүгө, мектептин ремонту үчүн деп чогултулуп келген. Мындан тышкары, майрам сайын окуу бөлүмүнүн башчысы директор үчүн да акча жыйнап алчу экен", — деп айтылат маалыматта.
Акыйкатчынын аппараты Бишкек мэриясынын алдындагы Билим берүү башкармалыгына кайрылып, атайын комиссия түзүлгөн. Ал мектептин мугалимдеринин жыйынына катышып, натыйжада окуу бөлүмүнүн төрт жетекчиси өз ыктыяры менен жумуштан кетүүгө аргасыз болгон. Ал эми директорго сөгүш жарыяланган.
Буга чейин Башкы прокуратура мектеп администрациялары окуучулар менен алардын ата-энелеринен финансылык жардам талап кылууга акысы жок экенин белгилеген.
