БИШКЕК, 5-окт. — Sputnik. Нура айылынан 60 чакырым алыстыкта жер титирөө катталды. Бул тууралуу ӨКМнин маалымат кызматы билдирди.
Силкинүү шаршемби күнү саат 13:30да аныкталды. Жер титирөөнүн очогундагы күчү 3 баллды түзсө, магнитудасы 3,5ке жеткен.
Жер титирөөнүн очогу Кыргызстандын аймагындагы Алай тоо кыркасында, Бор-Дөбө айылынан түштүк-батышты көздөй 12 чакырым, Арча-Булак айылынан түштүк-чыгышты карай 35 чакырым, Сары-Таш айылынан түштүк-батышты көздөй 35 жана Нура айылынан түштүк-батышты көздөй 60 чакырым аралыгында катталган.
Жапа чеккендер жок.
2008-жылдын 5-октябрында Кыргызстандын, Тажикстандын жана Кытайдын чек ара аймагында күчтүү жер титирөө болгон. Ош облустунун Алай районуна караштуу Нура айылы толугу менен талкаланып, 75 адам курман болгон, мында негизинен балдар жабыркаган.
