БИШКЕК, 4-окт. — Sputnik. "Дүйнө кан бийкеси — 2016" эл аралык сулуулук сынагына Кыргызстандын атынан Бегимай Назарова катышып, "Достук сулуусу" титулуна татыктуу болду. Бул тууралуу ал өзүнүн Instagram баракчасына жазып чыкты.
Сынактын жүрүшү Түркиянын Бодрум шаарында эки жумага созулган. Анда дүйнө жүзүнөн 24 сулуу чогулган. Кыздар "Дүйнө кан бийкеси — 2016" титулу үчүн ат салышып, натыйжада жеңүүчү болуп Сибирден келген Юлия Ваганова атыкты.
Сынактын финалдык бөлүгү кечээ Titanic Deluxe Bodrum отелинде өткөрүлгөн.
19 жаштагы Бегимай Назарова Мамлекеттик юридикалык академияда билим алат. Хореографияга кызыгып, кайрымдуулук уюмдарда ыктыярчы болуп алектенет.
"Дүйнө кан бийкеси — 2016" сынагы курорттук Бодрумда алты жылдан бери өтүп келет.
