БИШКЕК, 1-окт. — Sputnik. Президент Алмазбек Атамбаев карыларды Эл аралык күнү менен куттуктап, өз ата-энелердин, өз өмүрүн өлкөгө, балдарга, коомго арнаган бардык адамдар алдында коомчулук жоопкер экендигин айтты. Бул туурасында мамлекет башчынын маалымат кызматы билдирди.
"Пенсионерлерди жана ардагерлерди ар тараптан колдоо, улууларга камкордук социалдык да, гуманитардык да, мамлекеттик да милдет. Кымбаттуу ардагерлер, аталар менен апалар, чоӊ аталар менен чоң энелер! Биз баарыңыздарга дагы эле карызбыз, ар бир улгайган кыргызстандык ар тараптан камкордукка бөлөнүшү үчүн милдеттүү экенибизди сезебиз", — деген президент.
"Мамлекеттик саясаттын акыбети, коомдун адеп-ыйман деӊгээли улуу муундун жашоосунан, карыларга жасалган камкордугунан даана көрүнөт. Кыргызстан элинин улууларга урмат мамилеси, өзгөчө камкордугу — эзелтен келаткан салт. Улуу муундан кийинкилер каармандыктын, патриотизмдин, чыдамкайлыктын үлгүсүн алууга тийиш", — деп белгилеген Атамбаев.
Атамбаев карыларга каалоосун айтып, бакубатчылык жана өмүр тилеген.
"Кыргызстан элинин атынан сиздерге чыӊ ден соолук, бакубаттык тилеймин. Жакындарыӊыздын кашында аманчылыкта өмүр сүрүӊүздөр", — деген тилегин айткан Атамбаев.
Бүгүн дүйнөнүн көп өлкөлөрү сыяктуу эле Кыргызстанда да Улгайгандардын эл аралык күнү белгиленип жатат.
