БИШКЕК, 30-сен. — Sputnik. Борбор калаада улгайгандар күнүнө карата социалдык жарманке өтөт. Бул туурасында мэриянын маалымат кызматы кабарлады.
Жарманке улгайгандардын эл аралык күнүнө карата, Бишкекте 1-октябрда Курманжан датканын эстелигинин жанында саат 10:00дөн 14:00гө чейин болот. Иш-чараны Бишкек мэриясы менен карылардын ресурстук борбору биргелешип өткөрүп жатат.
Шаардыктар Ысык-Көлдөн, Чүйдөн жана Бишкектин өзүнөн келген улгайгандардын колунан чыккан буюмдарды сатып алууга мүмкүнчүлүк алат.
Жарманкеге кийизден, жүндөн жасалып, ар кандай жиптерден токулган кийимдер, буюмдар, сувенирлер, айыл чарба азыктары коюлат. Мындан сырткары шахмат турнири уюштурулуп, артисттер ырдап-бийлешет.
Кыргызстан дүйнөдөгү башка өлкөлөр сыяктуу эле 1-октябрда Улгайгандардын эл аралык күнүн белгилейт.
