БИШКЕК, 30-сен. — Sputnik. "Ноокат алмасы" деген бренд менен эми жергиликтүү алмаларды Кытайга, Түркияга экспорттоого келишим түзүлмөкчү. Бул туурасында Ноокат районунун акими Бекболот Айтиев билдирди.
Эске салсак, бүгүн Ош облусунун Ноокат районунда республикалык алма фестивалы болду.
Бул иш-чарага Казакстан, Түркиядан ишкерлер катышты. "Алма фестивалы" аталган аймакта экинчи ирет өткөрүлүп жатат.
Ал эми багбан Кубанычбек Жуманов багбандар алма түшүмүн экспортоодо бир топ кыйынчылыктарга дуушар болуп жаткандыгын айтып берди.
"Ошондуктан фестивалды өткөрүү аркылуу чет өлкөлүк ишкерлер менен сүйлөшүү жүргүзүү зарыл болуп турат. Антпесе, өстүргөн түшүмүбүз арзан баада кетип, же такыр эле соодаланбай калууда",— дейт Жуманов.
Фестивалды уюштууучулардын бири Азамат Касымовдун айтымында, Ноокат алмасы учурда Казакстанга дүңүнөн 35-55 сомдон сатылууда. Андыктан, бул жаатта ишкерлерди таап, экспорт маселесин жөнгө салуу маселеси турат.
