БИШКЕК, 30-сен. — Sputnik. Эртең борбор калаа Бишкекте аба ырайы башка күндөргө салыштырмалуу төмөндөйт, тагыраагы + 20 градус болот. Ал эми Ош шаарында + 23 градуска жетет. Бул туурасында Кыргызгидромет билдирди.
1-октябрда Кыргызстандын аймагында ылдамдыгы секундасына 20 метрге жеткен шамал болуп, ал эми Кыргызстандын тоолуу райондоруна кар жаашы күтүлөт.
Андан сырткары Кыргызгидромет 3-октябрга чейин өлкө аймагында аба ырайы кескин өзгөрөрүп, салкындаарын эскертти.
Мындай туруксуз аба ырайы айыл чарба иштерин, автоунаа, энергетика жана коммуналдык кызматтардын ишин жана жайыттарда малды кармоону кыйындатат.
3-4-октябрда Чүй облусунун тоо этектеринде, Талас өрөөнүндө жана Ысык-Көл ойдуңунун чыгышында айрым жерлерде 0…-2 градус болуп, үшүк жүрөт. Мындай үшүктүн жүрүшү жыйналбаган жашылчага, мөмө-жемиштерге жана казылып алынган картошка, кант кызылчасы үчүн коркунучтуу.
