БИШКЕК, 29-сен. — Sputnik. Үйдө союлган малдын эти базарларга киргизилбеши керек. Бул тууралуу биринчи вице-премьер Мухамметкалый Абугазиев ветеринардык жана фитосанитардык коопсуздук боюнча мамлекеттик инспекциянын автоматташтырылган маалыматтык системасын ишке ашыруу тууралуу жыйынында билдирди.
Абулгазиев ар бир райондун администрация башчыларын чакырып, аймактарда элди айыл-чарба тармагын жакшыртууга, түшүмдү мол алуудагы жаңы ыкмаларды жана мал багуудагы асыл тукумдуулукту арттырып, заманбап ыкмаларды өздөштүрүүнү үйрөтүү керектигин эскертти.
"Өлкөдө калктын 65 пайызы айыл жергесинде жашаса, анын 70-80 пайызы мал багып, талаачылык менен эмгектенет. Биздеги эң чоң көйгөй — айыл-чарба тармагында сапаттуулукту көтөрө албай жатабыз. Ошондуктан өкмөт башчынын демилгеси менен бардык аймактарда кооперативдерди уюштуруп, заманбап ыкмалар тууралуу билим алып, сандан сапатка өтүүгө убакыт келди", — деди атка минер.
Иш-чаранын соңунда Абулгазиев Ветеринардык жана фитосанитардык коопсуздук боюнча мамлекеттик инспекциясына, ар бир районго мал союучу цехтерди ачууга канча каражат жана убакыт кетерин эсептеп чыгуу жана аны ишке ашыруу мүмкүнчүлүктөрүн тез арада карап чыгуу тапшырмасын берди.
