БИШКЕК, 28-сен. – Sputnik. Премьер-министр Сооронбай Жээнбеков бүгүн, 28-сентябрда Нарын облусуна жасаган иш сапарынын алкагында чек арадагы "Торугарт" өткөрүү пунктунун иши менен таанышты. Бул тууралуу өкмөттүн маалымат кызматы билдирди.
Мындан тышкары, райондогу "Ат-Башы-Сүт" ишканасынын ишмердигин көрүп жатып, Жээнбеков Кыргызстандын Евразиялык экономикалык биримдикке кириши ата мекендик өндүрүшчүлөргө жаңы мүмкүнчүлүктөрдү ачып жатканын айтты.
"Өндүрүштү кеңейтүүгө умтулуу – алдыга жасалган кадам. Ошол эле маалда ишкананын продукциясы биздин өлкөнүн айыл чарба азыктарына кызыкдар болгон тышкы базарларга чыгышы керек. Эң башкысы продукция экологиялык жактан таза болуп, ЕАЭБдин өлкөлөрүнүн сүт азыктарына коюлган бардык талаптарына жооп бериши керек" — деп белгиледи өкмөт башчы.
Мындан тышкары, премьер-министр аталган райондун Бирлик айылындагы жаңы мектептин курулушу менен таанышты.
