БИШКЕК, 28-сен. – Sputnik. Бишкекте бейтаптардын азайышынан улам балдарды кургак учуктан дарылап келген оорукана жабылганы турат. Бул тууралуу Саламаттык сактоо министрлиги билдирди.
Ал эми былтыркы жылдын июль айынан баштап Бишкектин саламаттык сактоо мекемелери жергиликтүү эмес, республикалык бюджеттен каржылана баштаган. Акчанын көлөмү айыккан адамдардын санына жараша бөлүнүп келчү.
"№2 оорукана 60 орундуу, бирок 2016-жылдын июль-август айларында 6-7 бала дарыланды. Мындан улам каржынын көлөмү да азайды. Бул акча медициналык мекемени кармап турууга жетпейт. Оорукананын жабылышы менен бейтап балдар Улуттук фтизиатрия борборунун балдар бөлүмүнө жиберилет", — деп айтылат билдирүүдө.
Бишкектин Саламаттык сактоо департаменти учурда оорукананы шаардын муктаждыгы үчүн анын түзүмүн кайра карап чыгууну пландаштырып жатат.
