БИШКЕК, 27-сен. — Sputnik. Кыргызстандын саламаттык сактоо министри Талантбек Батыралиев дүйшөмбү күнү Алматыда Глобалдык фонддун аймактык менеджери Николас Кантау жана Казакстандын социалдык өнүктүрүү жана саламаттык сактоо министри Тамара Дуйсенова менен жолугушту.
КР Саламаттык сактоо министрлигинин маалымат кызматы билдиргендей жолугушуу учурунда мигранттарды дарылоо маселеси талкууланган.
Кантау кургак учук жугуштуу оору болгондуктан мигранттардын саламаттыгына жардам көрсөтүү системасын бир жолго салуу маселесин көтөрдү.
"Дуйсенованын айтымында, кургак учук менен ооругандардын көпчүлүгү мигранттар болуп эсептелет. Ал эми Батыралиев кургак учук менен ооругандарга сапаттуу медициналык тейлөө көрсөтүү үчүн атайын бирдиктүү маалымат базасын түзүү сунушун берди. Бирок тилекке каршы, айрымдар оорусун жашырып келишет", — деп айтылат маалыматта.
Мындан тышкары, Талантбек Батыралиев чек ара аймактарында жайгашкан мигранттарга медициналык жардам көрсөтүү маселесин көтөрдү. Ал эми казак тараптын маалыматына караганда өлкө аймагында иштөөгө уруксаты бар бардык чет өлкөлүк жарандарга, анын ичинде кыргызстандыктарга, медициналык жардам алууга жол ачык.
