Эске сала кетсек, КСДП, "Республика — Ата-Журат", "Өнүгүү-Прогресс" жана "Кыргызстан" фракциялары референдум жолу менен Конституцияны өзгөртүү демилгесин көтөргөн. Аталган сунушту президент колдоо алганы менен Убактылуу өкмөт мүчөлөрү Өмүрбек Текебаев, Роза Отунбаевалар каршы чыгышкан. Ошондон улам өлкөдөгү саясий кырдаал күч алып кеткен.
"Буга чейин демилгеленген мыйзам долбоору коомдук талкуудан өттү. Андагы сунуштар эске алынып, акыркы вариант ЖКнын сайтына илинди. Буюрса 27-сентябрь күнү аталган мыйзам долбоору ЖКнын Конституциялык мыйзамдар, мамлекеттик түзүлүш, сот-укуктук маселелер жана регламент боюнча комитетинде каралат", — деди Өмүркулов.
Эл өкүлү Конституцияны өзгөртүү боюнча биринчи сунушталган варианттын көп жери өзгөргөнүн айтып, президентке тиешелүү өзгөртүүлөр 2017-жылдын 1-декабрында күчүнө кирерин кошумчалады.
Белгилей кетсек, референдум жолу менен Конституцияны өзгөртүү боюнча мыйзам долбоору 29-сентябрда парламенттин отурумунда талкууланат.
