БИШКЕК, 19-сен. — Sputnik. Үңкүр-Тоодогу телемунаранын кызматкерлери жумушка чыгышты. Бул тууралуу Sputnik Кыргызстан агенттигине телемунаранын кызматкери, буга чейин өзбек милиция кызматкерлери кармап кийин бошотулган Нурбек Рыспаев билдирди.
Белгилей кетсек, 22-августта талаш жараткан чек ара аймагына Өзбекстандын күч кызматкерлери тик учак менен конгон. Ал эми 24-август күнү алар Кыргызстандын төрт жаранын кармап кетип Яңги-Курган ички иштер бөлүмүнө киргизишкен. Бара-бара өзбек милициясынын саны 20 адамга жетип, кечээ 18-сентябрда аймактан чыгып кетишкен.
"Жаңы эле Үңкүр-Тоого чыгып келдик. Ал жактагы абал дурус эле экен. Түштөн кийин да кошумча жумушчулар тартылат. Буга чейин өзбек тарап кармап кеткен төрт кызматкердин ичинен мен эле жумушка чыктым, калгандары үйлөрүндө. Алар жакынкы күндөрү ишин баштайт", — деди Рыспаев.
Ал эми Аксы районунун акими Медет Айдаралиев аталган маалыматты тактап, телемунара буга чейин автоматтык түрдө иштеп келгенин кошумчалады.
"Өзбек милиция кызматкерлери кечээ күнү Аксыдан чыгып кетишти. Тоодогу телемунаранын кызматкерлери жумушун улантышууда. Телемунара буга чейин эле автоматтык түрдө иштеп келген", — деди Айдаралиев.
Мамлекеттик байланыш агенттигинин түштүк аймактык башкармалыгы Үңкүр-Тоодогу телемунара үзгүлтүксүз иштеп жаткандыгын билдирди.
Ал эми Чек ара кызматы Аксыдагы абал тыкыр көзөмөлгө алынып, кыргыз-өзбек чек арасы күчөтүлгөн тартипте кайтарылып жатканын кошумчалады.
