БИШКЕК, 18-сен. — Sputnik. Күз-кыш мезгилине даярдык көрүүнүн алкагында сегиз айдын ичинде "Кыргызстан улуттук электр тармагы" ишканасы бир катар иштерди аткаргандыгы тууралуу компаниянын маалымат кызматынан кабарлашты.
"Кыргызстан улуттук электр тармагы" — гидроэлектрстанциялардан электр энергиясын бөлүштүрүүчү компанияларга транзиттик жол менен жеткирүүчү мамлекеттик энергетикалык компания. Анын карамагына эң ири "Датка — Кемин" электр өткөргүч линиясы кирет.
Учурда 110-500 киловаттуу 81 подстанцияны ремонттоо иштери толугу менен аяктады. Дагы 149 жогорку вольттогу подстанцияларга оңдоо иштери жүргүзүлүүдө. Мындан тышкары, 110 киловольттук аба линияларынын капиталдык ремонту аяктады.
Оңдоо иштеринин сапаты менен объектилердин даярдыгын Мамэкотехинспекциянын адистеринен түзүлгөн комиссия текшерет. Рейд 19-сентябрда башталат.
