БИШКЕК, 17-сент. — Sputnik. Мекке шаарындагы кыргызстандык ажылардын алгачкы тобу Бишкек шаарына жөнөп кетишти. Бул тууралуу ажыларды коштоп жүргөн КР муфтияттын маалымат катчысы Максат Атабаев Меккеден Sputnik Кыргызстан маалымат агенттигине билдирди.
Ажылар Мекке убактысы боюнча түнкү саат 00:10, ал эми Кыргызстандын убактысы боюнча (18-сентябрь) 03:10 Сауд Арабиясынын Жидда аэропортунан учуп кетишмекчи.
"Алгачкы топ менен 300 ажы, 18-19-сентябрда 600 ажы Бишкек шаарына учуп келет. Ал эми 20-сентябрдан 30-сентябрга чейин Ош облусунун ажылары мекенге кайтат", — деди Атабаев.
Ал эми КРдин Саламаттыкты сактоо министрлиги тарабынан бөлүнгөн дарыгерлер өз иштерин улантып, ажылардын саламаттыгын көзөмөлдөшүүдө. Ажылыкты уюштуруу боюнча республикалык штабдын өкүлдөрү учурда ажыларды мекенибизге узатуу ишин баштаганын Атабаев белгиледи.
Эске салсак, Кыргызстандан быйыл ажылык сапарга 3685 зыяратчы аттанып, анын баасы 2600 долларды түзгөн.
