БИШКЕК, 13-сен. — Sputnik. Таиландда Зика вирусу тездик менен тарап жатканына карабастан Саламаттык сактоо министрлиги элди ызы-чууга түшпөөгө чакырды. Бул тууралуу РИА Новости Bangkok Post басылмасына шилтеме берүү менен жазып чыкты.
Эпидемиологиялык департаменттин директорунун орун басары Опат Канкавинтхон тынчсызданууга себеп жок экенин белгиледи. Анын айтымында, Зика дарты өлкө аймагында 2012-жылы эле пайда болгон. Ал адамды өлүмгө дуушар кылбайт.
Учурда дартка кабылган 22 жаран медициналык борборго жаткырылып, аймакка 30 күндүк карантин жарыяланды.
Зика оорусу — маймылдардын курч инфекциялык илдети. Ал айрым учурда гана чиркейлер аркылуу адамга жуга турганы байкалган. Вирус көбүнесе кош бойлуулар үчүн өтө кооптуу, анткени ал түйүлдүктүн баш мээсине доо кетирет.
