БИШКЕК, 11-сен. — Sputnik. Рио-де-Жанейро шаарында өтүп жаткан Паралимпиада оюндарынын таймашына бүгүн, 11-сентябрь күнү спортчу Арстанбек Базаркулов чыгат.
Кыргызстандык спортчу жеңил атлетиканын ядро ыргытуу боюнча күч сынашып, мелдеш Бишкек убактысы боюнча саат 19.00дө көрсөтүлөт.
Эскерте кетсек, Паралимпиада оюндарына Кыргызстандан Эсен Калиев, Жыргалбек Орозбаев (пауэрлифтинг) жана Арстанбек Базаркулов (жеңил атлетика) барган. 9-сентябрь күнкү мелдеште Калиев 54 килограмм салмактык категорияда 154 килограммдык штанганы көтөрүп, бешинчи орунга ээ болду.
Паралимпиада оюндары — ден соолугу боюнча мүмкүнчүлүгү чектелген жарандарын спорттук мелдеши. Мында спорттун 22 түрү боюнча 528 медалдын комплектиси ойнотулат.
