БИШКЕК, 8-сен. — Sputnik. Tajik Air аба компаниясына тиешелүү Boeing 757 учагы кечээ күндүн жарымында "Манас" аба майданына кайра конууга мажбур болду. Бул туурасында Жарандык авиация агенттигинин директору Эрмек Өмүралиев Sputnik Кыргызстан агенттигине билдирди.
Анын айтымында, Boeing 757 учагы Бишкек — Душанбе каттамынын алкагында болжол менен саат 12лерде, 7-сентябрда "Манас" аба майданынан абага көтөрүлгөн.
"Бирок, кыймылдаткычтын иштебей калгандыгынан улам, Boeing 757 Бишкектин үстүндө жарым саатка чейин айланып учуп, акырында "Манас" аба майданына кайра конуу чечимин кабыл алышкан. Кыймылдаткычтары иштебей калган. Муну техниктер карап жатат. Окуя туурасында Тажикстанга кабарланды. Биз жүргүнчүлөрдү алып кетет деп маалымат берилгендиктен, экинчи бортту Тажикстандан сегиз саат күттүк. Бирок, ал техникалык тетиктерди жүктөп келгендиктен учакты дароо оңдоп-түзөөгө мүмкүн болгон жок", — деп билдирди Өмүралиев.
Агенттиктин жетекчиси алгач, жүргүнчүлөргө маалымат берилип, анан тамактандырышкандыгын билдирди. Алардын саны канча экенин билбей турганын кошумчалады.
"Эртең менен дагы бир Boeing 737 борту учуп келди, ал 8:30да жүргүнчү менен учуп кетти. Эки борт тең учурда Бишкекте, биринчиси жөнгө салынды, анын жарактуулугу туурасында акт толтуруп, Тажикстандын авиация боюнча бийлигине жөнөттүк. Алар уруксат бергенден кийин, биз да учуп чыгууга макулдук беребиз",— деди Өмүралиев.
Агенттиктин жетекчиси бул авариялык конуу деп эсептелбей тургандыгын кошумчалады.
