БИШКЕК, 3-сен. – Sputnik. Өзбекстандын көз жумган президенти Ислам Каримовдун акыркы сапарга узатуу зыйнатына 17 өлкөдөн делегация келет. Бул туурасында Sputnik Өзбекстан агенттиги өлкө өкмөтүнүн маалыматына таянып кабарлады.
Кечээ Өзбекстан бийлиги президент Ислам Каримов 78 жашында дүйнө салгандыгын жана сөөгү киндик кан тамган шаары Самаркандда жерге берилерин билдирген. Өлкөдө үч күндүк мөөнөткө аза күтүү жарыяланган.
"17 өлкөнүн делегациясы акыркы сапарга узатуу зыйнатына келишти, сөөк саат 12:00дө (Бишкек убактысы боюнча 13:00) жерге берилет", — деп кабарлаган агенттиктин маалымат булагы.
Мурда айтылгандай, Россиянын делегациясын президент Владимир Путиндин тапшырмасы менен өкмөт башчысы Дмитрий Медведев жетектеп келет.
Каримовдун сөөгү салынган учак эртең менен Ташкенттен Самаркандга келип конгон.
