Деңиз деңгээлинен эки миң метр бийиктикте жайгашкан Нарын облусундагы Жумгал районуна караштуу Миң-Куш кыштагы алгач 18 миң адамга ылайыкталган.
Советтер Союзу учурунда мында уран кени болгон. Бирок СССР таркагандан кийин завод жабылып, жумушсуздук өкүм сүргөндүктөн көпчүлүк тургундар кыштактан көчүп кетишкен. Эми төрт радиоактивдүү калдыкка коңшулаш болуу элди тынчсыздантып келет.
Өткөн кылымдын 50-жылдарында курулган имараттар жарактан чыккан. Жарандар эскирген үйлөрдүн кирпичтерин ташып кетип жатып, айрым үйлөр бомба түшкөндөй аңырайып калган.
Көпчүлүк имараттар авариялык абалда болгондуктан сыртына кулпу салынган. Себеби, балдар ойногону кирип кетсе, алардын өмүрүнө коркунуч жаралышы ыктымал.
Миңкуштуктар кыштак жоголуп бара жатканын айтышат. Бирок ошентсе да кичи мекенинен көчүп кетүүнү каалашпайт. Алардын айтымында, мындай климатты башка жерден табуу мүмкүн эмес. Жайкысын салкын, кышында жылуу. Жаратылышы дагы абдан кооз.
