БИШКЕК, 2-сен. — Sputnik. "Кыргызстан — кыска метраждуу тасмалардын өлкөсү" эл аралык кинофестивалы КМШ, Балтика жана Грузия мамлекеттеринен катышууну каалагандардан арыз кабыл ала баштады. Бул тууралуу Кинематографияны колдоо фондусу билдирди.
Маалыматка ылайык, быйыл 6-жолу өтө турган иш-чара КРдин Кинематографисттер союзу жана "Айтыш" коомдук фондусу тарабынан негизделип, улуу жазуучу Чыңгыз Айтматовдун элесине арналат.
"Быйыл аталган фестиваль 12-15-декабрь күндөрү "Манас" кинотеатрында өтөт", — деп айтылат билдирүүдө.
Фестивалда тасмалар эл аралык жана улуттук сынак өтүп, "мыкты тасма", "мыкты режиссура", "калыстар тобунун атайын байгеси" жана "көрөрмандардын сүймөнчүгү" номинациялары боюнча ат салышат.
Арыздар 30-октябрга чейин кабыл алынат.
