БИШКЕК, 1-сен. — Sputnik. Мурдагы өкмөт башчы Темир Сариев Жогорку Кеӊештеги айрым фракциялар сунуштаган конституциялык реформа тилекке каршы, коомдогу ажырымды жаратып жатканын тараткан билдирүүсүндө баса белгиледи.
Эске салсак, Баш мыйзамга өзгөртүү киргизүү боюнча демилге көтөрүлгөн эле.
Сариев өз билдирүүсүндө Баш мыйзам элди бөлүп жарбастан, бириктирчү өтө маанилүү документ экенин айтат.
"Ошондуктан бардык саясий күчтөр бири-бирин айыптабастан бул маселе боюнча мунаса табууга аракет кылышы керек. Эгер кырдаал акыркы күндөрдөгүдөй өнүгө берсе, өлкөдө олуттуу саясий кризис жаралат. Анын терс кесепети элибизге тиет. Буга байланыштуу мен бардык күчтөрдү Конституцияны реформалоо маселесине олуттуу жана кесипкөй мамиле кылууга чакырам", — дейт экс-премьер-министр.
Ал ошондой эле мыйзамдардын талаптарын аткаруу менен талкууга өлкөдөгү саясий күчтөрдү жана адистерди катыштыруу маанилүү экенин белгилейт.
Бул орган Баш мыйзамды реформалоо маселесин жакынкы аралыкта эмоцияга алдырбастан, тынч баштап, өзгөрүү сунушталган беренелердин мазмуну, мөөнөтү, процедуралары боюнча маселелерди аныкташы керектиги баса белгиленет.
Сариев андан сырткары, бул жерде Конституциялык реформанын демилгечилери менен парламенттик фракциялардын жетекчилеринин ролун өзгөчө белгилөө зарыл экенин айтат.
"Азыр эмнени көрүп жатабыз? Алар өзгөртүүлөрдү сунуштаганы менен аны коргогон жок. Реформа үчүн жоопкерчиликти иш жүзүндө президент өзүнө алды. Фракция лидерлеринин мындай позициясын же коркоктук, же коом алдындагы жоопкерсиздик же кандайдыр-бир провокация катары кабыл алууга болот", — деп айтылат билдирүүдө.
Мындай кадамдан улам коомчулук аталган фракция жетекчилеринин саясий жоопкерчилигин карап, мөөнөтүнөн мурда шайлоо өткөрүү тууралуу маселени көтөрүшү мүмкүн деп эсептейм, дейт Темир Сариев.
