БИШКЕК, 21-авг. — Sputnik. АКШнын Балтимор шаарында Поло аттуу ит сегиз айлык наристени өрттөн сактоо үчүн баланы денеси менен калкалап жаткан тейде күйүп өлгөн. Бул туурасында РИА Новости CBS News агенттигине шилтеме берүү менен жазып чыкты.
Кыздын энеси жана иттин ээси Эрика Поремски CBS News агенттигине окуянын чоо жайы тууралуу айтып берген.
Ал унаасын көздөй сыртка чыгып артына кылчайып караганда үйүндө өрт чыгып жаткандыгын көргөн. Ал эми үйүн ичинде Вивиана аттуу кызы менен Поло деген ити болгон.
"Мен үйдүн ичине кирүүгө аракет жасап жаттым. Кызым үстүңкү кабатта болчу. Калың түтүн каптагандыктан жогору көтөрүлө албай ары-бери чуркап жаттым", — деп билдирген Поремски.
Бир нече көз ирмемден кийин үстүнкү кабатка көтөрүлүүгө мүмкүн болбой калган.
Кызына жетүү аракетин көрүп жатып Поремскинин колдору менен бети күйүп калган. Бирок ал дүрбөлөңгө түшүп кеткендиктен күйүк алганын сезбей калган. Акырында Өрт өчүрүү кызматын күтүүгө аргасыз болгон.
Өрт өчүрүү кызматкерлери кырсык болгон жерге келип, экинчи кабатка көтөрүлгөндө Поло өзүнүн денеси менен ымыркайды калкалап жатканын көрүшкөн. Вивиананын денеси күйүк алганы менен тирүү калган.
Поремскинин айтымында Поло ошол күнү кырсыкты алдын ала сезгендей ары-бери чуркап, ыйлап, талмасы кармап калып жаткан.
Үй ээси беш жаштагы Поло Вивианага чейинки биринчи баласы болгондугун билдирген.
