БИШКЕК, 18-авг. — Sputnik. Оор атлетчи Иззат Артыковдун канында допингдин болушу мүмкүн эмес болчу. Бул тууралуу Sputnik Кыргызстан агенттигине Кыргызстандын оор атлетика боюнча курама командасынын башкы машыктыруучусу Үсөнкан Майназаров билдирди.
Буга чейин Соттук арбитраждык сот Иззат Артыковду Рио Олимпиадасында алган коло медалынан ажыратканын маалымдап, ага допинг текшерүүнүн натыйжасында спортчунун канынан табылган стрихнин каражаты себеп болгонун айткан.
Майназаров учурда териштирүү иштери жүрүп жатканын белгилеп, Артыков чынында эле тыюу салынган каражаттарды пайдалаганбы деген суроого "андай болушу мүмкүн эмес" деп жооп берди.
