БИШКЕК, 18-авг. — Sputnik. Социалдык тармактардын колдонуучулары Айсулуу Тыныбекованы коло медалдын ээси катары сыйлоону өтүнүп петиция менен бөлүшө башташты.
Алгач Тыныбекова Олимпиадалык оюндарда бразилиялык жана финляндиялык атаандаштарын жеңип алган. Бирок финалга чыгуу үчүн беттеште россиялык Валерия Кобловадан утулуп. Коло медаль үчүн беттеште алдыда келе жаткан Тыныбекова акыркы секунддарда индиялык Сакши Маликке алдырып жиберип, натыйжада бешинчи орунду ээледи.
"Кыргызстандын президенти Алмазбек Шаршенович Атамбаевден Айсулуу Тыныбековага коло медаль үчүн бериле турган бардык сыйлыктарды ыйгарууну суранам. Ал байгелүү орунга жетпей калганы анык, бирок акырына чейин туруп бардык күчүн жумшады. Спортчу бардыгыбызга үмүт жаратып, Кыргызстандын спорттук намысын кантип коргоо керек экенин көрсөттү. Ал кыргызстандыктар үчүн болгон күчү менен күрөштү. Келгиле, биз дагы колубуздан келчү кичинекей нерсени тартуулайбыз!", — деп жазды журналист Азамат Тынаев.
Белгилей кетсек, коңшу Казакстанда Олимпиадалык оюндардан күмүш медаль жеңген боксчу Василий Левита чемпион катары таанылып, ага 250 миң доллар сыйлык ыйгарылган.
Айсулуу Тыныбекова тууралуу кызыктуу 5 фактыны Sputnik Кыргызстандын материалынан окуй аласыздар>>
