БИШКЕК, 17-авг. — Sputnik. Мамлекеттер аралык авиациалык комитеттин комиссиясы (МАК) 2015-жылдын 22-ноябрында Ош аэропортуна авариялык абалда конгон Avia Traffic Company компаниясынын Boeing-737 учагы боюнча изилдөөсүн жыйынтыктады. Бул тууралуу аталган авиациалык коммитеттин расмий сайтында кабарланат.
"Экипаж Бишкектен экинчи ирет учуп жатканда аба ырайына анча көңүл бөлгөн эмес. Ош шаарында аба ырайынын өзгөрүп кетиши да эске алынбаган. Ал эми капитандын эки айлампа менен тумандуу аба ырайында учууга тажрыйбасы аздык кылган. Мындан сырткары, экипаж 13 саат уктабагандыктан конуу учурунда бир канча кемчиликтерди кетирген", — деп айтылат маалыматта.
Буга чейин учактын бир кыймылдаткычы үч миң метр бийикте эле белгисиз себептерден улам бузулганын КР Башкы прокуратурасы билдирген.
Ал эми Жарандык авиация агенттигинин директорунун орун басары Мураталы Токтобеков буга чейин МАКтын өкүлдөрү келип, атайын иликтөө жүргүзгөнүн, аталган иликтөөнүн корутундусу транспорттук прокуратурага жөнөтүлөрүн кошумчалады.
