БИШКЕК, 17-авг. — Sputnik. Улуттук "Дүйнөлүк көчмөндөр оюндары" коллекциялык күмүш тыйындарынын сатыкка чыккан саны сатылып бүттү. Бул туурасында аталган мекеменин маалымат кызматынан кабарлашты.
Эске сала кетсек, Улуттук банк 15-августта аталган тыйындарды сатыкка чыгарган. Анын баасы 2700 сом деп бекитилген.
"Алардын саны болгону — 1000 даана. Бишкек шаарына бөлүнгөн тыйындар бир сутка ичинде сатылып кетти. Бул Улуттук банк чыгарган коллекциялык тыйындардын рекорддук мөөнөттө сатылышы. Бул көрүнүш боло турган оюндарга карата жана өзгөчө дизайнда жасалгандыгы үчүн болду окшойт. Калган тыйындар облустарда сатылууда", — деп айтылат маалыматта.
Экинчи дүйнөлүк көчмөндөр оюндары Ысык-Көлдүн жээгинде 3-8-сентябрь күндөрү өтөт. Мында 35 мамлекеттен келген спортчулар күрөш, салбурун, жаа атуу, интеллектуалдык оюндар жана спорттун башка түрлөрү боюнча ат салышат.
Sputnik Кыргызстан маалымат агенттиги жана радиосу Көчмөндөр оюндарынын расмий медиа өнөктөшү болуп саналат.
