БИШКЕК, 13-авг. — Sputnik. Президент Алмазбек Атамбаев Жогорку Нарын ГЭС каскадын жана Камбар-Ата ГЭС-1ди куруу жана ишке берүү боюнча Россия менен макулдашуулардын аракети токтогонуна байланыштуу аталган объектилерди куруу үчүн өкмөт инвесторлорду активдүү издөө зарылдыгын белгиледи. Мамлекет башчысы бул туурасында бүгүн Улуттук энергетикалык холдинг компаниясынын төрагасы Айбек Калиевди кабыл алып жатканда айтты.
Мындан тышкары Атамбаев Улуттук энергетика холдинг компаниясынын башчысына бул маселе боюнча сунуштарды иштеп чыгууну жана Кыргызстанда жаңы гидроэлектростанцияларды куруп жана ишке тапшырууда зарыл жеӊилдиктерди берүү боюнча тиешелүү ченемдик-укуктук актыларды даярдоону тапшырды.
Бирок өткөн жылдын жыйынтыгы чыгарган маалымат жыйынында Атамбаев "Россия гидроэлектр станциянын Жогорку Нарын каскадын жана Камбар-Ата гидроэлектрстанциясын куруу боюнча макулдашууну аткара албай турганы көрүнүп турат", — деп айткан.
Анда президент Кыргызстан келишимден чыгып, жаңы инвесторлор изделиши мүмкүн экенин билдирген. Буга ылайык өкмөт келишимди денонсациялоого аракетттерди көрүп баштаган. Келишимди денонсациялоо жарлыгы президент тарабынан үстүбүздөгү жылдын 22-январында кол коюлган.
Жогорку Нарын каскад ГЭСин куруу үчүн документация иштерине 800 миллион сом корогонун "Жогорку Нарын ГЭС" ЖАКтын башкармалыгынын төрагасы Александр Варнаев Жогорку Кеңештин атайын комиссиясынын жыйынында билдирген.
