БИШКЕК, 12-окт. — Sputnik. Жума күнү Сочи шаарында Евразиялык экономикалык биримдикке мүчө мамлекеттердин премьер-министрлеринин өкмөттөр аралык кеңешинин жыйыны өтөт.
Өкмөт башчы Сооронбай Жээнбеков башында турган кыргызстандык делегациянын курамында вице-премьер Олег Панкратов, элчи Болот Отунбаев, Бажы кызматынын башчысы Азамат Сулайманов, ЕАЭБдеги Кыргызстандын өкүлү Үсөн Усупов, тышкы иштер министринин орун басары Эмил Кайкиев жана башкалар бар.
Күн тартибинде ЕАЭБдин Бажы кодексинин келишими каралат. Ал боюнча коллегиянын мүчөсү министр Мукай Кадыркулов доклад жасайт.
Ошондой эле техникалык жөнгө салуу боюнча министр Валерий Корешков биримдиктин аймагында дары-дармектин айланышы боюнча маалымат берет.
Жыйында дары-дармек рыногу, Казакстандын Дүйнөлүк соода уюмуна киришинен улам товарларды ташуу талкууланат.
