БИШКЕК, 11-авг. — Sputnik. Көчмөндөр оюндарынын алкагында Х Эл аралык төкмө акындардын айтышы өтө турганын "Айтыш" коомдук фондусунун жетекчиси Азамат Болгонбаев билдирди.
Айтыштын тандоо туру 15-августта саат 10.00 Улуттук драма театрында болот. Ага өлкөнүн бардык аймагындагы акындар катыша алат. Жаш курагы жана даражасы чектелбейт.
Тандоо турунан Кыргызстандан 8 акын, Казакстандан келген 8 акын тандалат. Упай тең болуп калган учурда жашы улуусуна жол берилет.
Байге фондусу 1,5 миллион сомду түзгөн айтыш 4-5-сентябрда Ысык Көл облусунун Кырчын жайлоосунда өтөт.
"Баш байге — 300 миң сом. Биринчи орунга — 150 миң, экинчи орунга — 100 миң, ал эми үчүнчү орунга — 80 миң сом берилет. Мында кош байге болот, башкача айтканда казак акындарына өзүнчө, кыргыз акындарына өзүнчө сыйлык берилет", — деп айтылат билдирүүдө.
Ошондой эле 8 акынга 30 миң сомдон кызыктыруучу сыйлык берилет. Жалпы жонунан айтышка катышкан 16 акынга тең байге ыйгарылат.
