БИШКЕК, 10-авг. — Sputnik. II Дүйнөлүк көчмөндөр оюндарында өрт коопсуздугун камсыз кылуу үчүн 55 техника менен 207 куткаруучу тартылат. Бул тууралуу Көчмөндөр оюндарынын катчылыгынан кабарлашты.
"Өрт куткаруучулар эл чогулган жерде ар кандай чукул кырдаалдар жаралып кетпеши үчүн кезектешип күзөткө турушат", — деп айтылат маалыматта.
Ал эми тоскоолдуксуз кыймылды камсыздоо үчүн Бишкек — Балыкчы — Чолпон-Ата — Кырчын — Каракол — Бишкек стратегиялык унаа жолдоруна туруктуу негизде мониторинг жүргүзүлүп турат.
Дүйнөлүк көчмөндөр оюндары 3-8-сентябрь аралыгында Ысык-Көлдүн жээгинде өткөрүлөт. Ага катышууга 35 мамлекет билдирме жөнөттү.
Sputnik Кыргызстан маалымат агенттиги жана радиосу Дүйнөлүк көчмөндөр оюндарынын расмий медиа өнөктөшү болуп саналат.