БИШКЕК, 6-авг. — Sputnik. Келечекте Баткендеги Зардалы айылын туристтик жайга айландыруу үчүн бардык мүмкүнчүлүктөр бар. Бул тууралуу өкмөттүн аталган облустагы өкүлү Абиш Халмурзаев Кара-Бак айылына болгон иш сапарынын учурунда эл менен жолугушуп жатып билдирди.
Кара-Бак айыл өкмөтүнүн башчысы Сүйүнбай Убаевдин маалыматы боюнча айылда туруктуу 28 кожолук же 128 адам жашаганы менен эрте жаздын келиши менен калктын саны 1500ге чейин көбөйөт. Себеби тургундардын жайыттары негизинен Зардалы өрөөнүндө жайгашкан. Ошондуктан жаздан кеч күзгө чейин 3 миң бодо мал, 20-30 миң кой-эчки жайыттарда болот.
"Зардалы айылы облустун борборунан 125 чакырым алыстыкта жайгашкан. Айылда 24 орундуу башталгыч мектеп жана ФАП иштөөдө. Андан тышкары, Коргон чек ара заставасы жайгашкан. Өрөөн кенге бай аймак. Сейрек кездешүүчү вольфрам, кобальт, алтын жана сымаптын корлору бар экендиги аныкталган", — деди өкмөт башчы.
Халмурзаев айылдын инфраструктурасын оңдоого, жолду оңдоп-түзөөнү жана электр энергиясын жеткирүүгө жергиликтүү жана облустук бийлик биргелешип план түзүп, келечекте аймакта туризмди өнүктүрүүгө биргелешип иш алып барууну баса белгиледи.
