БИШКЕК, 5-авг. — Sputnik. Казакстандын аймагына жашылча-жемиштерди алып кирүүгө казак тараптын убактылуу чектөө коюусун КРдин Айыл-чарба министрлиги туура эмес деп эсептейт. Бул тууралуу министрликтин маалымат кызматы билдирди.
Шейшемби күнү Казакстандын Айыл чарба министрлиги өлкөнүн фитосанитардык кызматы Кыргызстандан келген 300 тоннадан ашык жашылча-жемишти киргизбей койгонун билдирди. Казак министрлигинин маалыматы боюнча 330,86 тонна калемпир, өрүк, алма, жүзүм жана картошкадан зыянкечтер табылган.
Кыргыз тарап Казакстанга жана Евразиялык биримдиктин аймагында ташылган жүктөрдүн кыргыз-казак чек арасында текшерүүгө алынышы ЕАЭБдин карантин жана фитосанитардык көзөмөл боюнча кабыл алынган токтомдорунун нормаларын бузуу болуп эсептелерин баса белгилейт.
Андан сырткары, казак тарап Жогорку Евразиялык экономикалык кеңештин кыргыз-казак чек арасындагы ветеринардык-санитардык жана карантиндик көзөмөлдү алуу боюнча чечимин аткарбай жатканын да айтат.
Жолугушуунун жыйынтыгынан кийин КРдин Айыл чарба министрлиги чек арадагы казак тарап фитосанитардык көзөмөлдү албаганын билдирди. Ошондой эле 2015-жылдын август айынан тарта Кыргызстандан келген бардык товарларды тыкыр көзөмөлгө алып, "Кордай" чек ара пунктунда карантиндик лабораторияны иштетип келгени аныкталган.
Андан сырткары, "Кордайдагы" лаборатория Евразиялык экономикалык комитеттин коллегиясы тарабынан бекитилген талаптарга жооп бербей турганы да белгиленген.
Кыргызстандагы жашылча-жемиштердин бышуу маалын Sputnik Кыргызстан инфографикасынан көрүңүз>>
