БИШКЕК, 18-июл. — Sputnik. Ишемби күнү Каракол шаарында Тарых жана маданият жылынын алкагында "Улут баскан улуу жол" аттуу этнофестиваль өттү. Бул тууралуу өкмөттүн Ысык-Көл облусундагы өкүлчүлүгүнүн маалымат кызматы кабарлады.
Иш-чара "Кыргыз айылы каада-салт ордосу" деп аталган театрлашкан оюн менен башталып, анда кыргыз элинин каада-салттары, жашоо-тиричилигиндеги колдонулган ырым-жырымдар көрсөтүлдү. Дасторкон жайылып, келген коноктор менен элге тартууланды.
"Этнофестиваль кыргыз элинин байыртадан келе жаткан салт- санаасын, бабалардын бизге таштап кеткен улуттук-маданий баалуулуктарын, улуттук кийимдердин кооздугун, Ысык-Көл облусунда жашаган элдин ортосундагы ынтымакты көрсөттү", — деп айтылат маалыматта.
Этнофестивалдын алкагында "Калпак фестивалы" өтүп, анда баш кийимдердин бир нече түрлөрү көрүүчүлөргө тартууланды.
