БИШКЕК, 14-июл. — Sputnik. Бейшембинин түнүдө Алмазбек Атамбаев Кыргызстанга келген Германиянын канцлери Ангела Меркелди "Манас" аэропортунан тосуп алды.
Кыргызстанга биринчи жолу келген Ангела Меркель алгач эле кыргыз боорсогунан ооз тийди. Ал боорсок мыкты экенин айтты.
Боорсокту Меркель келердин алдында жасашкан. Башкы технолог Георгий Нагай жалпысынан үч килограмм боорсок бышырылганын айтты.
"Биз өзүбүздүн атайын рецепт менен жасайбыз. Ага эмнелерди канча көлөмөдө кошорубуздун сырын ачпайм, бирок, жалпы керектелген кошулмалар тууралуу айтайын. Негизинен ун, сүт, майонез, өсүмдүк майы, ачыткы, туз, шекер жана бир аз суу кошобуз. Анан албетте, алардын барын жакшы маанай менен жууруйбуз. Андыктан боорсоктор даамдуу болот", — деди башкы технолог.
Ангела Меркелдин иш сапары бүгүн аяктайт.
