БИШКЕК, 14-июл. — Sputnik. Японияда жашагандардын саны жети жылдан бери улам кыскарып бара жатат. Быйыл жыл башында жалпы эл 128 миллион 66 миң 211ди түздү. Мурдагы жылга салыштырмалуу 160 миң 272 адамга азайып кеткен. Бул маалыматтарды Күн Чыгыш өлкөсүнүн ички иштер жана коммуникация министрлиги билдирди.
2016-жылдын 1-январына карата таза япондордун саны 125 миллион 891 миң 742 адамды түзүп, ал 2015-жылдагыга салыштырмалуу 271 миң 834кө кыскарган.
Ал эми чет элдиктердин саны 111 миң 562 адамга көбөйүп, алардын саны 2 миллионго чукулдаган. Ошентип, Японияда туруктуу жашаган чет элдиктердин саны жергиликтүү элдин 1,7 пайызын түзүп калды.
Япондуктардын арасында төрөлүү жылына 1 миллион 10 миң 46 адамды, өлүм — 1 миллион 296 миң 144 кишини түзгөн. Мындай айырма Япон калкынын санын кыскартууга алып келүүдө.
