БИШКЕК, 12-июл. — Sputnik. "Ак-Жар" (Аламүдүн району) жаңы конушунда жашаган эркек киши аялын токмоктоп жана бир нече ирет бычак урган деп шектелүүдө. Бул туурасында Чүй облустук ИИБдин маалымат кызматы кабарлады.
Маалыматта күйөөсү-аялы кер мур айтыша кеткенден кийин, андан соң күйөөсү аялын сабаганы аз келгенсип, бычактап салган.
"Жабырланган аял күйөөсүнүн үстүнөн арыз жазуудан баш тартты. Азыр иликтөө иштери жүрүп жатат. Аял арыз жазбаса деле тергөөчү соттук-медициналык экспертизанын жыйынтыгы менен кылмыш ишин козгой алат",—деп билдиришти облустук милициядан.
Тез жардам станциясынан жабыр тарткан аял 39 жашта экендигин билдиришти. Дарыгерлер анын башы жарылып, мээси чайкалып, моюну жабыркап, денесинин ар кайсы бөлүктөрүнө бир канча бычак урулганын жана ал II деңгээлдеги травмалык шок алгандыгын билдиришти.
Аял Бишкектеги №4 шаардык травматология жана ортопедия борборуна жеткирилген.
