БИШКЕК, 8-июл. — Sputnik. Премьер-министр Сооронбай Жээнбеков Бишкек — "Манас" эл аралык аэропортуна кеткен жолдун оңдолушун көзөмөлдөп, анын начар жасалганын белгиледи. Бул тууралуу өкмөттүн маалымат кызматы билдирди.
Жээнбеков аталган унаа жолунун стратегиялык маанисине токтолуп, Транспорт жана жолдор министрлигине бардык оңдоо ишин белгиленген мөөнөттө жыйынтыктоо тапшырмасын берди.
"Унаа жолдогу аткарылган оңдоо иштеринин сапаты аймактык деңгээлге да жооп бербейт. Кыргызстанга келген меймандардын өлкө тууралуу пикири ушул жолдон башталат. Ошондуктан оңдоо иштери жогорку деңгээлде жүргүзүлүшү керек", — ал.
Транспорт министри Замирбек Айдаров бүгүнкү күнү Бишкек — "Манас" эл аралык аэропортуна кеткен жолдун чыгыш тараптагы бөлүгү толугу менен курулуп бүткөнүн айтты.
Ошондой эле премьер-министр Бишкек шаарынын Рыскулов жана Жибек Жолу проспектисинин ортосундагы Ала-Арча дарыясынын жээгин оңдоо ишинин жүрүшү менен таанышты.
Бишкек шаарынын мэри Албек Ибраимовдун маалыматына ылайык, муздардын тоңуп калуусуна байланыштуу шаар аймагынын суу алдында калуу коркунучу бар. Буга байланыштуу Бишкек шаарынын мэриясы Өзгөчө кырдаалдар министрлиги менен биргеликте Ала-Арча дарыясын механикалык жол менен тазалоо иштерин жүргүзүүдө.
Өкмөт башчы тийиштүү мамлекеттик органдарга Ала-Арча дарыясына байланыштуу өзгөчө кырдаалдардын келип чыгуу ыктымалдыгынын алдын алуу боюнча комплекстүү иш-чараларды жүргүзүүнү тапшырды.
