БИШКЕК, 4-июл. — Sputnik. Мамлекеттик каттоо кызматынын Таластын Манас районундагы башкармалыгынын жетекчилигине жасалма документ берген фактысынын негизинде кылмыш иши козголгонун ИИМ билдирди.
Маалыматка ылайык, аталган кызматкерлер 2015-жылдын февраль айында көзү өтүп кеткен 74 жаштагы кемпирдин атына жарым жылдан кийин туулгандыгы тууралуу жасалма күбөлүк беришкен. Анын негизинде туугандары артындагы үй-мүлкүн талашуу үчүн сотко кайрылышкан.
Мында кыймылсыз мүлккө болгон укукту каттоо башкармалыгынын жетекчилиги расмий документтерге жалган маалыматтарды киргизүү менен маркумдун үйүн чет элдик жарандын атына жаздырып беришкен. Ал эми көзү өткөн кемпир турак жайын башка туугандарына мурастап кеткен.
Аталган фактылар боюнча кылмыш жаза кодексинин 304-беренесинин (Кызмат абалынан кыянаттык менен пайдалануу) негизинде кылмыш иши козголуп, тергөө иштери жүрүп жатат.
